النتائج 1 إلى 4 من 4

الموضوع: عروسة محتاسة

هنبدأ بــالمفروشات بصي يا عسولة انتى وهي احنا هنجيب فى حدود المعقول.. لا عايزين نفتري ولا نجيب قليل بردو الملايات لو تاخدو بالكو النص الفوقاني حاجات كلاسيك شوية والنص

  1. #1

    عروسة محتاسة

    هنبدأ بــالمفروشات
    بصي يا عسولة انتى وهي احنا هنجيب فى حدود المعقول.. لا عايزين نفتري ولا نجيب قليل بردو


    الملايات

    عروسة محتاسة 13764537825659.jpg
    لو تاخدو بالكو النص الفوقاني حاجات كلاسيك شوية والنص اللى تحت ينفع مودرن.. ودي حاجة لازم تراعيها وانتى بتشتري الملايات بناء على نوعية عفشك ياعروسة

    لقيت من خلال تجارب عرايس كتير ان عدد 10 طقم ملايه لحد 15 مثلا حلو قوووووووي

    هتنوعي ما بين مطرز (راعي يكون التطريز على الجوانب بس مش عالجزء اللي هتنامي عليه علشان ميضايقكيش)

    ومنقوش

    وسادة خالص (ستان او قطن او قطيفة بقى على حسب ما تحبي)



    مفرش العروسة
    عروسة محتاسة 13764538621084.jpg
    وطبعا المفرش اللى على اليمين ينفع كلاسيك واللى على الشمال مودرن اكتر.. واللى فى النص لحاف ينفع مودرن او كلاسيك بسيط.. والبطاطين انا بفضل الخفيفة الاسباني بتدفي جداااااااا


    (مش بفضل ان سعره يزيد عن 500 ابدا بصراحة)

    لو فرشك مودرن دوري على واحد رقيق يا اما تستغني عنه بلحاف شيك

    لو فرشك كلاسيك يبقى عادي هاتيه مزخرف هيليق



    2 بطانية و1 لحاف

    يا اما لو مش بتحبي اللحاف زيي هاتي 3 بطانية

    الاسباني الاصلي مورا اقل حاجة ب800 تقريبا.. والتقليد بتاعها مورانو فى حدود 250 وفيه بقى الكوري والمجد بصراحة معرفش اسعارهم

    عروسة محتاسة 13764541745986.jpg

    المفرش البوكليت ده يا بنات ناعم وعجبني قوووووي بس نصيحة لوجه الله اغسليييييييييه قبل ما تفرشيه هو والكوفرتات
    2 مفرش شتوي

    فيه المفرش الموهير او البوكليت الاتقل شوية بحوالي 60 جنيه وفيه الطقم بتاع المجد اللي بيوصل ل 200 جنيه



    2 كوفرتة على حسب زوقك والامكانيات فيه ناس تحب التقليدية القديمة وفيه ناس تحب الاشكال المطرقعة او القطيفة.. عموما العادية من 45 لحد 90 جنيه تقريبا.. والقطيفة بحوالى 320 والقطن من 300 ل400 والفايبر الخفيفة فى حدود 200






    عروسة محتاسة 13764545154100.jpg

    بردو يا بنات راعي فوط التواليت تكون سادة خالص ومش مطرزة وتكون خامتها حلوة والبشكير لو قدرتي تطقمي معاه فوطة وسط من نفس لونة يبقى حلو جدااااااا


    البرنس (الفرداني احلى من الطقم) علشان وبرته اعلى وبيتراوح من 75 ل265 بتاع كاربت سيتي

    2 بشكير وواحد تالت يكون اطفالي شوية

    6 فوط فرداني سادة خالص مقاس وسط

    ومعاهم 6 تانيين نفس الوانهم مقاس اصغر (انا جبت الفوطة الوسط السادة خالص من الغورية بحوالي 18 جنيه ومردتش استغلى)

    طقم فوط مطرز شيك وده هتحطي منه لما يجيلك ضيوف (وده جبته غالى وشيك بس بردو مودرن وغالب عليه السادة حروفه بس اللى مطرزة)

    وبلاش أي فوط قطيفة يا بنات مش عملية ومش بتنشف هاتي اللى قطن من الوجهين



    8 الى 12 فوط تواليت المربعة الصغننة دي (ويفضل تجيبيها سادة خالص بلاش المطرز)


    عروسة محتاسة 13764547821452.jpg
    طبعا فوق الذوق المودرن واللى على الشمال تحت ده مفرش سفرة شغل هندي واللى على اليمين مفارش نيش شغل هندي بردو هتراعي لون عفشك والصيني وانتى بتختاريهم


    6 الى 12 فوطة مطبخ ويفضل الوان غامقة تستحمل عك وبهدلة المطبخ يا بنات



    فوط سفرة (بتنفع فى العزومات فقط.. وياريت تكون من مية الطقم الصيني.. يعني لو نقشته فضي هاتيهم رمادي لو نقشته دهبي هاتيهم بيج لو نقشته ملونة ياريت اقرب لون لنقشة الطقم الصيني)

    مفرش السفرة

    (هيبقى شغل سورى او هندي لو سفرتك كلاسيك ومفرش رانر او ستان لو سفرتك مودرن ويفضل بردو يكون من نفس مية الطقم الصيني والوان الحيطان)

    مفارش النيش (هتراعيها سادة خالص او حتى هتستغني عنها لو سفرتك مودرن) وبراحتك بقى مطرزة زي ما تحبي من الشغل الهندي والسوري
    مفارش الأطفال

    وبردو هنخليها حاجة بسيطة بس بذوق وتنسيق
    ازاي بقى هقولك

    الاول الاعداد
    طقمين او 3 ملايات مجوز بتاع الاطفال
    طقم لحاف فايبر مجوز بتاع اطفال
    كوفرتتين
    (عندك امكانية تزودي طقم ملايات كمان مجوز يبقى خير وبركة.. ولو اني شايفة طقمين او 3 معقول قوي)

    ازاي بقى هننسق الاوضة ونخليها تحفة
    هتختاري شخصية كرتون (عيشي طفولتك فى الاوضة دي يا عروسة ).. وتجيبي طقمين الملايات نفس الشخصية دي بس لونين مختلفين مثلا لبني وأصفر
    هتجيبي ستيكرات (الكبيرة اللى فى محلات 2.5) لنفس الشخصية دي وتعلقيها على الحيطة
    هتجيبي دبدوبين لنفس الشخصية او لو امكانياتك تسمح تجيبي كذا حجم يبقى فل قوي .. ودول هتحطيهم على السراير

    حاجتين كمان هتراعيهم.. سجادة الاطفال ياريت تكون لنفس الشخصية
    ولو تقدري تحطي صندوق للالعاب فى الاوضة يبقى حلو جداااا.. لو ملقتيش لنفس الشخصية يبقى هاتيه ساده يليق مع لون الحيطان

    فى الموضوع ده بقى بالذات يا فتاتيك بحس ان البنات بتفتري او هتفتح مركز تجميل
    لا احنا محتاجين حاجات بسيطه بس طبعا نضيفة لان بشرتنا لاااااااااازم نحافظ عليها

    البرفان

    عروسة محتاسة 13765260434905.jpg
    وياريت يا بنانيت تخلى البرفان اللى هتستخدميه فى ليلة الدخلة للمناسبات المتميزة قوي وبلاش تستخدميه عمال على بطال

    مش محتاجة اكتر من 4 زجاجات برفان هيكفوكي اكتر من سنة ولو انتى مش بتحطي برفان وانتى خارجة ممكن يقعدو معاكي يمكن سنتين واكتر.. وياريت تحاولي تعرفي هو بيحب روائح المسكرة وللا الزهرية وللا العربية.. وبالنسبة لبرفان العريس يا حلوين والله انتى مش مجبرة اساسا.. معاكي 100 جنيه زيادة وللا حاجة هاتيلة زجاجتين برفان وكريم بعد الحلاقة.. مش معاكي خلاص كتر خير اهالينا انهم بيجهزونا اصلا

    الشامبو والشاور وخلافه

    عروسة محتاسة 13765263157970.jpg


    هاتي نوعين بس شامبو مثلا اللى بترتاحي فيهم عندك شامبوهات ايفون واورفليم حلوين وكمان شامبو تريسمي لتر تقريبا ب 70 جنيه
    والبلسم تريسمي بردو حلو نفس حجم وسعر الشامبو او بردو حاجات ايفون واورفليم حلوة
    وحمام كريم للشعر
    ونوع زيت لو بتستخدمي زيوت لشعرك
    وسيرم علشان يخفف الهيشان
    وواقى الحرارة لو بتستعملي سيشوار او بيبي ليس

    والشاور هاتي علبتين اللى هي لتر ونص بتاعة ماي واي العلبة ب11 جنيه وعطورها حلوة جدااااا
    ولو فيه امكانية هاتي من بودي شوب الشاور اللى معاه لوشن وسبراي للجسم كلهم بنفس الريحة
    رفايع العناية الشخصية

    عروسة محتاسة 13765267923438.jpg



    متنسيش ملح الحليب حلو جدااااااااا جدا بينعم البشرة وبيخفف اثار الحبوب اللى فى الظهر وبيخلى الشعراية الصغنونة الملفوفة تحت الجلد تظهر وبالتالي مش بيطلعلك حبوب بعد ازالة الشعر من جسمك

    وبردو متنسيش يا عروسة يا ننوسة تجيبي الليفة المغربية علشان تتعودي تمرشي نفسك على الاقل مرة كل اسبوع ويكون ده العادي بتاعك.. والله بتعرفي تعملى الحمام المغربي هاتي باقى مستلزماته.. مش بتعرفي يبقى اكتفي بسخونة المية مع الشاور وامرشي جسمك بالليفة المغربية وبعدين ملح الحليب وبعدين ترطبي جسمك باي كريم او لوشن
    واكيد مش هتنسي طقم العناية بالاظافر (قصافة للايد وقصافة للقدم وملقاط ومقص صغير ومبرد يفضل يبقى ناعم علشان مش يبوظ ضوافرك) ومش لازم طقم يعني جمعيهم وحطيهم فى اي علبة شيك او حتى بوك صغنون

    وطقم العناية بالقدم اللى هو مبرد كبير كدا بتبردي بيه الجلد المين وبعدين تعملي بالحجر ومبعدين المبرد الناعم وفى الاخر تحطي جلسرين او فازلين وتبقى رجلك انعم من الحرير

    وطقم كام فرشاة للشعر على كام مشط يا حلوة متنسيهمش وياريت لو معاهم مقص وسط تخليه مخصوص تبقى تساوي شعرك بيه

    ومحبوبتين الجماهير البيبي ليس والبروان سيلك ابيل.. طبعا على حسب استخدامك وامكانياتك.. وياريت الفتوكات يفيدونا بخبراتهم في الحاجتين دول



    المكياج

    عروسة محتاسة 13765269723374.jpg
    كريم أساس افتح من بشرتك درجة واحدة
    بودرة اساس مضغوطة افتح من بشرتك درجة واحدة او اتنين
    كونسيلر تحت العين افتح 3 درجات من لون بشرتك
    2 لون أي لاينر
    2 لون ماسكارا
    بالتة آيشادو فيها الوان اللى بتليق عليكي
    2 لون روجاجو (انا شخصيا هكتفي بكرات اللؤلؤ بتاعة اورفليم البينك)
    2 لون روج ماط
    2 لون روج جلوس
    3 او 4 الوان مانيكير وياريت يكون الاسلامي اللي بيتشال بسهولة او ممكن تجيبي الالوان اللى تحبيها هو مش غالي وبيبقى شكله حلو وبيتشال بسهولة جداااااا

    اللبس اللي محير كل البنات.. وبردو فى المعقول بدون افترااااااا

    وهنراعي ان الصيفي بيتهلك عن الشتوي اسرع فهنكتره عن الشتوي

    الخروج
    3 اطقم صيفي (3 جيبات او بنطلونات او متنوع على حسب ستايل لبسك.. ومعاهم 3 الى 4 بلوزات يليقو مع الوانهم)
    3 اطقم شتوي (جاكت او 2 ويفضل واحد رمادي او اسود وواحد بني او بيج.. و3 جيب شتوي و2 بلوفر مثلا ومعاهم تونيك تقيل)
    3 شنط و3 احذية تليق مع الوان الاطقم
    وطبعا الطقم بالكارينا لو بتلبسيه بطرحة او اتنين يليقو معاه

    عروسة محتاسة 13766281354086.jpg
    طبعا فيه حاجات ينفع تلبسي تحتها كارينا وفوقيهم جاكت هتنفع شتوي بردو

    عروسة محتاسة 13766282338822.jpg

    وبردو دي فيها حاجات ممكن تستغني عن الجاكت وتلبسي كارينا او بوليرو صيفي



    اللانجيري
    قميص الدخلة ابيض طويل بروب
    3 كمان قميص طويل بدون روب
    6 الى 8 قميص قصير بدون روب ونوعي ستان على شيفون على تل على اورجانزا
    3 فستان قصير ينفع للمناسبات السعيدة واي احتفال بينكم
    3 طقم تنكري (والتنكري ده للي ميعرفوش لانجيري بس على شكل خدامة او ظابط او تلميذة وبيبقى معاه اكسسوار الطقم) وده للتجديد لو حسيني ان فيه فتور بعد فترة من الزواج
    2 شراب كامل للجسم
    2 بيكيني

    عروسة محتاسة 13766284361280.jpg
    معظم المتجوزين بيقولو الطويل مش عملي الا لو كان على شكل فستان بينفع فى المناسبات الحلوة.. وبشكل عام مش لازم تكتري القمصان بس نوعي زي الصور كدا فساتين مع اللانجيري

    عروسة محتاسة 13766285463901.jpg
    متعديش تقولي ياي بقى وهتكسف البس الكلام ده.. لا يا فوزية هتلبسيه بس مش لازم اول يوم خليه لما تبتدي تحسي ان العلاقة الزوجية بقت روتينية وفيها فتور.. خليكي ناصحة ومتديلوش فرصة يبحلق للبنات بره عروسة محتاسة smiley-amazed.gif حاكم دول تندب في عينهم رصاصة عروسة محتاسة smiley-badface.gif


    الداخلي
    دستة اندرات قطن ليكرا (الدستة بتتباع ب70 جنيه فى الموسكي) ودول اكتر حاجة هتريحك وقت البريود
    3 الى 6 هوت شورت قطن ليكرا (بردو لوقت البريود او عادي بيبقى اغراء مع اي بادي بحمالة)

    3 سوفت برا كارينا (حلو قوي فى البيت كأنك مش لابسة برا اصلا وسعره 20 وفيه منه تقليد ب12.5 تقريبا لو الامكانيات متسمحش)
    وفيه يا بنات ماركة اسمها سيلفي منها طقم سوفت برا مع اندر ولو عاوزة نوع ارخص فيه ماركة روتانا بردو طقم سوفت برا مع اندر
    4 الى 6 برا بوش اب (حبيتي تجيبي الطقم او فرداني وتوفقي معاه اندرات مدلعة براحتك)
    6 الى 8 اندرات مدلعة

    عروسة محتاسة 13766286979481.jpg
    البيت
    صيفي
    6بيجامه برمودا وياريت يكون فيها حركات في الكتف او الظهر او البنطلون مثلا
    6طقم هوت شورت وبردو ياريت يكون فيه حركات واحدة كب وواحدة حمالة وواحدة ظهرها شفاف او عريان
    4 الى 6 بيجامة بنطلون يبقى مثلا 2 بكم و2 نص كم (دول تقعدي بيهم قدام مامتك ومامته واخواتكم البنات)


    عروسة محتاسة 13766289684026.jpg
    اطقم الهوت شورت التركي اللى فوق اسعارها من 75 وبتوصل ل100 او اكتر كل بياع وضميره.. البيجامات من الشمال 135.. السالوبت 160.. بيجامة بنفسجي 120.. بيجامة بيج فى تايجر 135.. بمبي تايجر 145.. بنفسجي نص كم150.. بكم تقريبا ب190.. ودي اقل اسعار كنت بشوفها على النت.. وخلي دايما حتى بيجاماتك مغرية مش زي اللى بيشوف اخته وخالته لابسينهم

    6 الى 10 كاش مايوه وبردو مفيش مانع تنوعي كب على حمالة على كت على كتف شفاف ودي اكتر حاجة بتريح فى اللبس فى الصيف ووقت الحمل يا بنات

    2 جلابية قطن نص كم واتنين بكم ودول مش بس هينفعوكي فى الحمل لا كمان ممكن تقعدي بيهم قدام حماتك واخواتو البنات او ام كم معاها ايشارب وتقعدي بيها قدام حماكي في زيارات الصيف فى بيتك.. ولو هتقعدي في بيت عيلة كتري منهم يا حلوة ونصيحة هاتي القطن الزبدة بلاش الفسكوز بتاع قماش جلاليب كرداسة بيحرررررر.. ونصيحة كمان تخليها ليها زراير او سوستة علشان لما ربنا يرزقك بيبي تعرفي ترضعيه



    عروسة محتاسة 13766296401726.jpg
    قلنا ان البلوزات دي هتلاقيها فى محلات بواقي التصدير فى حدود 35 ل60 جنيه تقريبا.. والجيب يا اما تفصليها يا اما تجيبيها فى الاوكازيون .. والتوك كل ما يبقى معاكي بتاع 50 جنيه انزلي محلات 2.5 لقطيلك كام توكة على باندانا على بنس مطرقعة.. وشباشب بنانيتي كدا شيك انا لقيت حاجات حلوة في روكسي


    شتوي
    4 الى 6 ترنج نوعي قطيفة على موهير على ميلتون
    3 ليجن (سترتش) شتوي متبطن
    2 كولون صوف كارينا واحد سادة وواحدة الوان مطرقعة
    1 او 2 جينز سكيني
    3 او 4 بلوفرات ضيقة او فيها حركات زي كتف ساقط وكلام من دا

    2 على الاقل جلبية بيت شتوي ومتقوليش مش بحبهم
    لان فى الحمل (ربنا يرزق كل البنات) مش هتطيقى تلبسي بنطلون اصلا وياريت بردو يكون الصدر مفتوح بزراير او سوستة.. وبردو هتكملي مظهرك بآيس كاب حلو او توك او باندانا تليق على البيجامة او اللى انتى لابساه


    عروسة محتاسة 13766301273722.jpg
    اول صورة فوق على اليمين بتوضحلك المظهر لما هتلبسي بلوفر شيك وسكسي على كولون صوف او سترتش شتوي او جينز سكيني.. والبلوفرات دي مش غالية بردو هاتيها من محلات بواقي التصدير فى حدود 40 الواحد.. خليكي البسي في البيت اللي هو بيشوفه في الشارع يا اوختشي حتى فى الشتا خليكي مغرية وبونبوناية






  2. #2
    المطبخ

    بصو يا بنات..المطبخ ده قبل ما تجيبي أي حاجة فيه لازم تحددي انتي من هواة المطبخ والحركات والافتكاسات وللا بتدخليه تقضية واجب علشان ده هيفرق كتير قوي في شرائك لادوات المطبخ

    وطبعا بما ان المطبخ ورفايعه وتقايله بلااااااااااااعة فاحنا بردو هندور على المعقول وصدقيني سيبك من منظرك قدام أي مخلوق ولا حماتك ولا قرايبك ولا أي حد.. مطبخك لو مكركب هيبقى بششششششع صدقيني

    وعمرك ما هترتاحي وانتى واقفة فيه.. وهتلاقي نفسك عاينة نص جهازك تحت السرير ولا هتتمتعي بحاجة لانك بردو في الاخر هتستخدمي اللي علي قدك انتى وزوجك .. وكبيرك هتطلعي حلة وللا اتنين مقاسهم اكبر في العزومات.


    الحلل

    مش عاوزين اكتر من طقمين او بالكتير 3
    الاستانلس اساسي ممتاز في السلق وطبخ الخضار (النوع انصح بالمصانع الحربية.. افضل حاجة وعن تجربة)
    التيفال (او السيراميك) واحد فيهم مش الاتنين .. وطبعا معروف للمحاشي والمقلوبة والرز واي حاجة مش عاوزينها تلزق.. (النوع انصح بسافلون التركي عن تجربه.. وميمنعش تحافظي عليه وتغسليه بليفه سفنج من غير دعك)
    لو حبيتي تزودي هاتي الصاج (بينفع في عمل ملوخية وللا لسان العصفور وانصحك لو انتى في بيت عيلة وحد هيدخل يطبخ في مطبخك او حلل طالعة وحلل نازلة يبقى هو اللي تعملي بيه كدا.

    حلة الضغط هاتيها لو فيه امكانيات.. وانا مجربة نوع اسباني اسمه فاجور وموجود في درب سعادة.. ودي بتنفع في تسوية الكرشة والكوارع وكباب حلة

    والبط في وقت قليل جدا.. بس اكيد محتاجة حرص في فتحها بعد الطبخ.. (وممكن توفري تمن طقم الصاج وتزودي عليه حاجة بسيطة وتجيبي حلة الضغط)

    الأعداد والمقاسات
    انا مش بفضل الطقم يزيد عن اربع الى خمس حلل.. والمقاسات هتجيبي مقاس وتفوتي مقاس.. بمعني هبدا بمقاس 20 .. يبقى هجيب 20/ 24/ 28/ 30


    الطاسات

    طاسة تيفال مقاس 18 تكفي بيضتين
    طاسة تيفال مقاس 24 لو هتعملي فيها قطعتين بوفتيك وللا بانيه وللا كبدة
    طاسة تيفال مقاس 30 او 32 ودى للكميات الكبيرة بقى
    طاسة غويطة تيفال او سيراميك (ليها اسم تانى ووك) للفشار والشاورمة وما شابه (ودى لو انتى من هواة الطبخ والافتكاسات)
    طاسة ستانلس غويطة بالشبكة لتحمير البطاطس
    3 كسرولة ب3 مقاسات مختلفين.. وانا بفضل ستانلس مش بحب الالمونيوم ولا التيفال
    طقم كنك
    طاسة غويطة مقاس 18 او 20 المونيوم او ستانلس (ودي هتجيبيها لتسخين الاكل لو انتى مش ناوية تجيبي مايكروييف)



    الصوانى والطواجن

    الكيك هاتيله صوانى المونيوم لانها افضل حاجة في تسوية الكيك عن تجربة يا بنات.. وسيبك من التيفال والسيلكون أي كلام
    طقم صوانى بسبوسة 3 مقاسات وبنصح بردو المونيوم في دول وهتستخدميهم للبسبوسة او البيتزا او الرقاق او الجلاش


    3 صواني بايركس مقاس يكفي فردين ومقاس اكبر شوية ومقاس اكبر شويتين للعزومات (انا جبت الشكل البيضاوي وندمت لان التقسيم بتاعه مش عدل في المناب زي الشكل المستطيل)
    2 صينية تيفال (مش ضروريين قوي لو انتى مش من هواة الطبخ)
    2 صينية ستانلس
    2 طاجن فخار (برام) وسط وكبير
    6 طواجن فخار صغيرين (ام علي ورز بلبن فرن بقى والكلام ده.. يعني لو انتي ملكيش قوي فى المطبخ يبقى متجيبهمش)






    زجاج المطبخ

    3 زجاجات مياه
    شفشق زجاج
    8 الى 12 كبايات للشاي
    6 كبايات مياه وياريت نفس نقشة او تصميم كبايات الشاي
    طقم شفشق ب6 كبايات للعصير
    6 مجات للنسكافيه او الكاكاو
    6 سلاطين صغيره للحلويات (هاتي مقاس ميكونش موجود عندك في اطقم الاطباق ولا الصيني)
    ولو انتي من هواة المودرن زيي ومش ناوية تجيبي طقم التوابل الخزف الغريب ده يبقى هاتي 6 او 9 برطمانات زجاج بغطاء ملون (يفضل لون مطبخك) ودول بقى للينسون والقهوة والحلبة والكركديه والسحلب والحاجات دي.. ومعاهم واحد كبير للسكر وواحد اصغر شوية للملح
    2 برطمان للمخلل
    سكرية زجاج عادية
    طقم كاسات ايس كريم وسلطة فواكه


    رفايع المطبخ
    هاتي كشكولين فلوسكاب وتعالى ورايا


    تربو البطل والبطاطس
    طقم مغارف ستانلس
    طقم مغارف خشب أو الاسود بتاع التيفال.. وانا انصح بالخشب افضل في التقليب اثناء الطبخ.. وبتاع التيفال ملوش لزمة غير في الغرف من صينية او حلة تيفال على السفرة قدام الضيوف (شوفي استخدامك ايه)
    مضرب بيض يدوي (مهم قوووووي في تقليب البشاميل)
    2 مصفاة ستانلس واحدة صغيرة وواحدة كبيرة
    مساكة ستانلس (فى ناس بيقولو عليها ماشة)
    مساكة سيليكون (للطاسات التيفال)
    شياطة ارز
    مسند القهوة اللي بيتحط على العين الصغيرة عالبتوجاز
    براد ستانلس أو كاتيل (غلاية بالكهربا)
    طقم التوابل الدوار الستانلس احلى من الخشب وب85 جنيه ال16 .. فى درب سعادة.. وطبعا ال16 عملى عن ال12.. ولو انتى من حريفات الطبيخ والوصفات وبتعرفي فى التوابل يبقى هاتي واحد تاني كمان 12

    فرشاة دهان الزيت (السيلكون احلى)
    سباتيولا (معلقة مسطحة تنفع للتيفال او تساوي بيها الكريم شانتيه)
    قطاعة البيض
    قطاعة التفاح (وطالع جديد قطاعة المانجو وقطاعة البطيخ)

    مبشرة جوزة الطيب (لفرم فص او اتنين توم)
    مقشرة بطاطس
    مقوار (الملفوف ده اللى طالع جديد حلو جدااااااا على فكرة يا بنات)
    مسن سكاكين (متقوليش مش هينفعك بجد حلو جدا لما السكاكين تتلم)
    طقم ملاحات للاستخدام اليومي
    حامل سائل وليفة المواعين (التركي اللي فيها عليقة الخاتم ب18 والمصري ب13 تقريبا)
    سكينة سيلكون (انا شفتها في عوض الله اللي فى المنصورة واحلى من الخشب بس لو مش لقيتيها الخشب شغالة بردو للصواني التيفال)





    اشكال ستانلس او خشب لوضع الحلل الساخنة عليها
    مقشرة السمك
    قواعد الكبايات

    مبشرة
    مشابك الغسيل
    قطاعة بيتزا
    مدق بوفتيك
    منخل دقيق
    هراسة بطاطس
    جوانتي مطبخ (يفضل قطن مبطن باي قماشة عازلة للحرارة)
    مريلة مطبخ (يفضل تكون وش مشمع ووش قطن)
    معلقة الايس كريم
    معلقة تصفية البطاطس (اللى عاملة زي بتوع الطعمية.. عملية جدا على فكرة)
    سكاكين فاكهة (بيبقو 6 سكاكين شكل بعض طقم واحد)
    قوالب جيلي وكريم كراميل
    ولاعة بتوجاز
    طقم مصافي شاي ستانلس
    قطاعة المخللات المشرشرة
    نشابة
    كيس حلواني (كيس كريم شانتيه)
    مقص للفراخ
    مقص للسمك

    عصارة ليمون
    2 قطاعة (واحدة للخضار وواحدة للحوم والاسماك)







    عيدان الشيش طاووك
    عليقات المطبخ
    قوالب اشكال للتلج والشيكولاتة
    معالق وشوك لاستخدام المطبخ (6 فقط متنسيش انك هتجيبي شنطة المعالق للعزومات)
    مجات شوربة
    حامل مناديل المطبخ (يفضل اللى بيتعلق في الحيطة بالطول اسهل في شد وقطع المناديل)
    صينية عشاء كبيرة
    طقم صواني تقديم ميلامين

    طقم أطباق المطبخ للاستخدام اليومي (بورسلين بقى او صيني تجميع او ميلامين او اركوبال او اركوبايركس او بايركس على حسب رغبتك)
    ساعة للمطبخ
    قوالب تقطيع البسكوت
    فرشاة لغسيل زجاجات المياة
    قطاعة بسبوسة
    ستاندات لأطباق النيش
    صينية الكب كيك
    قوالب كب كيك ورق
    مساحة زجاج
    مكاييل ومعايير



    مجموعة سكاكين ستانلس (لو انتى زيي من محبي السكاكين هحط صورة مخصوصة لاشكال كل سكينة واستخدامها.. ولو مش بيفرق معاكي مش هتحتاجي اكتر من واحدة صغيرة وواحدة وسط وواحدة كبيرة نوعا ما فهاتيهم نوع كويس يكون كلها ستانلس) ويفضل يكونو في حامل لسهولة الاستخدام وحفظ النصل.. ولو مش عندك حامل وجبتي فرداني زيي فيه حامل سكاكين خشب بيتباع في حمام التلات او درب سعادة ب15 جنيه


    جوانتي إزالة الغبار
    جوانتي مطاط سميك لاستخدامات المطبخ
    جوانتي مطاط سميك لتنظيف الحمام
    شموع ملونة ومعطرة (لزوم تغيير الجو .. ومتحرقيش كل افكارك فى اول الجواز.. خلي الكلام ده لما يبتدي الملل والروتين يبدأو.. ولو حبيتي فيه كبايات صغيرة ملونة ورخيصة ممكن تحطي فيها الشموع)
    عيدان تنظيف الأذن
    عيدان تسليك الأسنان
    طبق مكسرات متقسم
    حامل الشوي للفراخ
    ميزان مطبخ وميزان حمام (دول نوعا ما رفاهيات وملهومش اهمية كبيرة)
    مانع طرطشة الزيت (موجود في محلات 2.5)
    حامل المجات
    عليقة ستانلس (لتعليق الطاسات التيفال عليها)
    عليقة ستانلس قريبة للبتوجاز (تعلقى عليها جوانتى المطبخ وفوطة والمغارف الاستانلس)
    طبق ستانلس غويط للعجن (وده طبعا لو انتى زيي ايدك تقيلة على اطباق البلاستك وبتكسريها.. ومش هتحتاجيه لو عندك عجانة فى الكيتشن ماشين)




    البلاستكات

    (أفضل الأنواع التركي وخورشيد والشريف واخر حاجة الهلال والنجمة.. ولو انتى من القاهرة قصاد حمام التلات فرع كبير قوي دزرين للهلال والنجمة بيبيع باسعار الجملة تقريبا)

    وياريت بلاش تكتري منها علشان هتكركبلك البيت


    2 سبت غسيل مقاس وسط (خلي واحد للابيض وواحد للألوان)
    طبق غسيل كبير (طشت بلاستك)
    فرشاة تواليت
    فرشاة لتنضيف حوض الحمام
    جردل المسح والشرشوبة
    باسكت بغطاء للتواليت (طبعا راعي ان بلاستكات الحمام تكون لون واحد ويكون من الوان السيراميك او ستارة البانيو)
    ستارة البانيو
    غطاء الغسالة
    كيس غسالة للشرابات
    كيس غسالة للبرا
    طقم الصبانة
    رفوف البانيو (هتعرفي الاول انتي محتاجاها ركنة بين جدارين وللا عادية هتتعلق على جدار واحد)
    منشر غسيل (لو انتى مش ناوية تنشري فى البلكونة لأي ظرف)
    حبل غسيل
    باسكت المطبخ (بلاش المقاس الكبير هاتي مقاس وسط يكفى المخلفات اليومية علشان تترمي كل يوم)
    مقشة خشنة

    مقشة ناعمة
    2 مساحة
    زعافة
    جروف ومقشة صغننين للسفرة
    جروف ومقشة
    لمامة سجاد
    عدد باسكت قمامة صغير لغرف النوم والأنتريه



    سلم للمطبخ (طبعا ده اساسي لو انتي أوزعة)
    كرسي بلاستك للمطبخ ويفضل واحد تاني للحمام
    ترابيزة المكواة

    طقم علب للتلاجة وياريت يكون بيدخل المايكروييف
    مجموعة أطباق بلاستك للجبنة والمخللات (وياريت تكون من نفس الوان طقم العشا بتاعك)
    مجموعة أقماع بلاستك (حروفها ناعمة.. للممبار والسجق وتعبئة أي سوائل)
    مجموعة برطمانات (أو علب ام كلبسات من الجناب دي بردو حلوة قوي وتنفع ومش غاليه) بلاستك شفافة لتخزين البقوليات (لو فيه امكانية يكون زجاج يبقى اشيك.. انما البلاستك زي الفل بردو وبيأدي الغرض)
    عياشة (طبق للعيش ليه غطا او غطا لوحدو وطبق لوحدو بس نفس الألوان)
    طبق تسالي مقسم
    صفاية اطباق وكبايات للحوض
    طفاية معالق للحوض
    منظم درج المعالق والشوك
    بخاخة
    3 اطباق غويطة مختلفة الحجم لغسيل الخضروات
    طبق غسيل الرز
    مصفاة بلاستك للفواكه والخضار
    طبقين غويط وياريت شكلهم شيك (لمحبات ومحبين الفشار زيي)
    2دورق بلاستك واحد بغطاء للمطبخ وواحد للحمام

    عليقة بالمشابك بتاعة الحمام (لنشر الاندرات وفوط التواليت فى الحمام)
    سبت صغنون للمشابك (وياريت يكون واسع وليه بس أي ايد يتعلق منها فى مسمار فى البلكونة)
    منفضة
    سلاكة حوض
    دستتين شماعات على الأقل (ليكي ولزوجك)
    رياشة للتراب

    رول ستيكر خشابي لفرش ارضية دواليب المطبخ (بيبقى 15 متر ب45 جنيه)





    النيش

    بالنسبالي النيش عبارة عن مكان بعيد عن بخار المطبخ المليان دهون هحط فيه طقم الصيني وكبايات شاي ومية وكام طقم كاسات شيك لاستخدامهم في المناسبات الخاصة او التقديم للضيوف او العزومات.. واي حاجة هجيبها هتبقى للاستخدام مش للتحنيط في النيش

    ومبدأيا يا بنات سواء نيش مودرن أو كلاسيك لازم بردو يبقى بسيط ورقيق.. وتحسي انك في بيت مش فاترينة معرض مستلزمات منزلية

    يعني بلاش ترصي طقم الصيني كله.. مثلا رصي في كل رف سرفيس وحواليه كام فنجان قهوة وسطهم فنجان شاي.. او ممكن براد الشاي وحواليه شوية فناجين وعلى الجوانب طقمين كاسات
    ولو مودرن بحب يبقى طبق واحد او طبقين فى كل رف وطقم كاسات نصه على يمين الطبق ونصه التاني على الشمال (هوضح اكتر بالصور)

    المستلزمات بقى هيبقى من ضمنها حاجات التقديم للضيوف (وانا مش بعترف باطقم القهوة والكاكاو والشاي لان بعتبره بصراحة افترا .. وفى الاخر كلها فناجين موجودة بالفعل فى طقم الصيني)

    طقم الصيني
    طقم عشا (اركوبال او اركوبايركس)
    شنطة المعالق (انا بعتبرها مهمة وبالذات فى العزومات لان انا اسرتي ماشاء الله كبيرة يعني بحس ان ليها استخدام وناوية اجيبها باذن الله)
    وممكن لو حبيتي تجيبي اشكال كريستال تحطيها زينة فى النيش
    صواني تقديم ستانلس
    بونبونيرة
    شيالة كحك
    طبق فاكهة
    من 4 الى 6 اطقم كاسات (لو نيشك مودرن ياريت تختاري كلهم شفاف او كلهم بحز دهبي او فضي بس يكون زي طقم الصيني.. وواحد بس ملون من الوان طقم العشا مثلا او الصيني.. هنوزعهم على الرفوف بشكل متناسق)
    طقم كبايات عصير بدورق او شفشق
    طقمين كبايات شاي وطقم كبايات مياة (ياريت تكون نفس شكل كبايات المياة)






    اشكال لرص النيش الكلاسيك









    لاحظو يا بنات رغم ان النيش كلاسيك في كل الصور بس البساطة مخلية شكله احلى بكتيييير عن النيش الزحمة





    أشكال لرص النيش المودرن











    يا اما لون واحد هو اساس الكاسات والباقي شفاف.. يا اما الطقم الصيني هو اللي يبقى ظاهر وبردو بشكل بسيط



    (الموضوع بسيط جدا والله بس احنا اللى معقدينة وواخدينها سباق مين جايبة اكتر)



    الأجهزة الكهربائية والخلاط


    طبعا بتختلف من اسرة لأسرة اذا كانت عالعريس وللا العروسة

    بس اللى شفته في كل الجوازات اللى عاصرتها ان الخلاط بالتحديد على العروسة لانه بيعتبر من تجهيزات المطبخ


    الخلاط
    وده طبعا حبيب قلبي وايد ورجل الست في المطبخ
    ومش شرط يكون نوع غالي ولا امكانيات جبارة.. بس المهم حددي انتي بتعملي ايه فى المطبخ وايه اكتر استخداماتك قبل ما تقرري هتشتري ايه


    فيه ناس بتحب تجيب كل حاجة لوحدها (انا معملتش كدا لاني مش بحب أي زحمة عالرخامة بصراحة).. بس بردو وجهة نظرهم تحترم ان بيقولو ميبقاش التحميل على موتور واحد لو جرالة حاجة هبقى لايصة
    بيجيبو ايه بقى (شفشق بمطحنة.. كبة "وياريت تكون وات عالى تقدري تفرمي فيها اللحوم" .. عجانة أومضرب بيض)

    وفيه الهاند بليندر ده ناس كتير بتشكر فيه بس بتشتكي انه بيسخن بسرعة (الوات بتاعه ضعيف).. فعلشان كدا انا بعتبره جهاز مكمل وبينفع قوي في شوربة العدس او خلط السوائل جوة الحلة

    الكيتشن ماشين
    اسعاره بتبدأ من 1000 لحد عندك بيوصل ل9000.. على حسب الوظائف والوات بتاعه
    على أي حال منصحكيش بأي كتشن أقل من 1000 وات

    والماركات الكويسة عندك كينوود ملك الخلاطات (ايوة صيني ومع ذلك ممتاز).. وده يا ستي فيه منه محضر طعام كذا موديل 1000 وات بتتراوح اسعارهم من 1000 ل2300 وعجبني قوي موديل fp921 ده 1000 وات ب1600 جنيه (من شركة القاهرة للمبيعات فى ميدان السبع عمارات) .. وفيه شفشق ومطحنة وعصارة فواكه وعصارة برتقان وكبة كبيرة وكبة صغيرة ومضرب بيض وسلاح للخفق واسلحة بشر وتقطيع

    وفيه كمان موديلات الكيتشن ماشين اللي فيها عجانة
    العجانة فقط بحوالي 1500.. واللي بيبقى عجانة وشفشق ومطحنة وكبة بحوالي 4000
    والكيتشن الكامل اللي فيه كل القطع ومعاه ميزان مطبخ وليه شفشق ستانلس ده ب6200 .. موديل km023

    وفيه اخوه اللي فيه سخان بتطبخي فيه علطول ده ب9000 .. ملناش دعوة بيه يا بنات وحش قوي سيبك منه


    وعندك براون وسط في اسعاره وامكانياته (ابو كبتين مفيهوش مطحنة انتبهي كويس قوي للنقطة دي هو700 وات بحوالي 1000 جنيه)

    وفيليبس بردو بنات بتشكر فيه بس معنديش اي معلومات عنه بصراحة.. بس اعرف ان اسعاره معقولة

    ومولينكس بعتبره اضعفهم بجد جربته في بيتنا وبابا جابه فرنساوي اصلي وتكة واحدة على الرخامة طرف الشفشق اتكسر.. ومع ذلك بنات كتير بتشكر فيه فعلشان كدا كتبته (بس الفرنساوي بردو احسن اكيد من المصري)









    المكواة
    وانا مش بفضل اللي بالبخار .. بفضل العادية القديمة (باناسونيك الياباني.. ب250) بتاعة زمان ومعاها بخاخة وخلاص

    البيبي ليس
    يعتبر بقى من اساسيات العروسة.. واحسن الانواع بيبي ليس وبراون ساتين هير وريمنجتون

    السيلك ابيل
    بردو من الاساسيات ومنجز للمهمات السريعة وخليكي في الوسط بلاش الغالي قوي ولا الموديلات القديمة قوي
    الوسط هيكون فى حدود 300 جنيه او اقل

    الشواية الكهربا

    هي مش أساسية قوي.. بس لما بسوي الفراخ او اللحمة او الاجنحة والوراك نص سوا في عرقها بالتتبيلة واكمل سواها على الشواية الكهربا بصراحة بتبقى حلوة قوي.. وبنات كتير بتشكر فى كينوود بحوالي 400.. بس انا مجربة ماركة صيني اسمها هوم ب125 وشغالة حلو بس عاوزة مشترك نضيف لان شغلتها على واحد رخيص سيحته وسيحت السلك بتاعه وكانت هتبقى حريقاا

    المايكروييف
    بعتبره اساسي لأي ست بتشتغل.. ومفيد قوي وعملي بردو لست البيت .. ونوع دايو كويس واسعاره معقولة .. ويفضل تجيبيه مش اقل من 30 لتر لان الاصغر فعلا صغير قوي.. وملوش داعي اختراعات الشواية والكونفكشن والحاجات اللى ملهاش لزمة دي.. هو وظيفته يسخن بسرعة جدا ويفك التجميد عن اللحوم والفراخ ويبقى كتر الف خيره

    الفرن الكهربا
    (سامحيني يا عروسة.. انتى عندك بالفعل فرن في البوتجاز.. فرن الكهربا بياخد وقت شوية فى التسخين والتسوية وبيسحب كهربا جامد.. مش بحبه بصراحة)

    غسالة الأطباق
    انتى كدا كدا .. لازم تنضفى الاطباق من بقايا الطعام قبل ما تحطيها.. كملي جميلك وحطي نقطتين سائل مواعين وتبقى كدا خلاص غسلتي الاطباق.. ايه لزمتها بقى؟؟؟.. بالإضافة لمسحوقها الغالي.. وبصراحة اصلا معنديش معلومات عنها

    الديب فريزر
    بالله عليكي انتو نفرين في الشقة.. هتخزني ايه فى الديب فريزر على الاقل فى اول سنة جواز؟؟.. ومع ذلك ممكن يكون مفيد للست اللي بتشتغل.. واحسن أنواعه اللي يكون أدراج وأكيييييييد (نو فروست).. والانواع كريازي و وايت ويل (اللي عندو معلومات فى الماركات ياريت يفيدنا)

    المكنسة الكهربائية
    اعتقد لا غنى عنها .. ال جي حلوة وفيلبس كمان وناس بتشكر في باناسونيك الياباني.. وانا معجبة بهيتاتشي البرميل بس بأمانة مش عارفة حلوة وللا لأ

    الغسالة الأتوماتيك
    غالبية البنات شكرو قووووي في ال جي سواء فول اتوماتيك او فوق اتوماتيك.. واريستون بردو حلوة
    التلاجة
    الكل اجمع على ال جي انها احسن حاجة.. ال14 قدم بحوالي 3000 بس عيبها الوحيد انها صغننة شوية

    التليفزيون
    بردو معظم البنات شكرو في ال جي اللي هي ال سي دي.. وياريت يا بنات بلاش اكبر من 32 بوصة يعني يكون سعره من 1500 ل2000.. بجد حرام تدفعي في تلفزيون اغلى من كدا

    البتوجاز
    بردو روحي روحي روحي.. لو بتدوري على افضل حاجة ومش مهم السعر يبقى عليكي وعلى أريستون أو جليم جاز اقل سعر 4000 .. ايطالي وتوحفة ورهيب وربنا يقدرني اشنكل العريس علشان نفسي الجيب البتوجاز بقى بصراحة


    لو بتدوري على جودة حلوة وسعر معقول عندك يونيون تك (ياجمالو ياجمالو) الاربعة شعلة اللي فيه مروحة في الفرن (بحوالي 2000 جنيه).. وكريازي القديم الاربعة شعلة.. بتوجاز المصانع الحربية

    (تبعدي عن ايه بقى.. تبعدي عن تكنوجاز ال6 شعلة عندنا فى البيت يكرهك فى المطبخ التايمر والاشعال ونور الفرن باظو من اول شهر.. الفرن زباااااااااااااالة ونارة ضعيفة.. عيون البتوجاز كل ما توطي للاخر النار تطفي لوحدها... وابعدي عن يونيفرسال قرايب كتير جربوه وفرنه زبالة بردو)











  3. #3
    هنتكلم عن ازاي تخزني جهازك يا عروسة

    الهدوم والمفروشات
    هتحتاجي صابون وبخور بالريحة اللي بتحبيها والشنط المشمع الكبيرة


    بصراحة انا بحط صابون كامي الصغير اللى في كيس وبفتحه من نحية واحدة



    الشنط دي رووووووووعة يا بنات فى تخزين الهدوم والمفروشات بس ملحوظة مهمة.. خيطي طرف السوستة من النحيتين لان تقفيلها مش قد كدا والسوستة بتتخلع مني كل ما افتح او اقفل للاخر

    ودي خبرتي انا الشخصية كمخللاية قديمة عمالة تجيب في جهاز من غير عريس
    الشنط المشمع الكبيرة ام سوستة دي (حطيت لكم صورتها).. بحط الصيفي في كيس كبير وجوة الكيس صابونة مفتوحة من جنب واحد.. وهكذا الشتوي واللانجيري كل تصنيف في كيس وكل كيس فيه صابونة من كل جنب واقفل الكيس واحطه جوة الشنطة المشمع.. وجوة الشنطة المشمع بين الاكياس بحط عيدان البخور

    هتراعي أي رسمة مطبوعة (تجيبي أي فانلات قديمة من بتاعة باباكي او اخوكي تقطعيها وتحطي حتة بين كل قطعة هدوم والتانية لو الهدوم فيها طباعة من اللي ممكن تلزق)

    وعادي جدا فيه بعض الجلاليب او الحاجات بسيبها في كيسها الشفاف ده عادي

    وكل ما تجيبي حاجة جديدة بتطلعي الحاجة تهويها وتطبقيها وتشمي احلى ريحة (وتقولي هو الموكوس كل ده ولسة مجاش دنا هخلل جنب الحاجة)

    الفوط والبرانس في شنطة مشمع لوحدهم وبردو صابونتين تلاتة مفتوحين من جنب واحد في وسطهم
    الملايات هيبقو في شنطتين او 3 من الشنط المشمع دي
    الكوفرتات بردو في شنطة.. والمفرش والبطاطين لو شنطهم مش كويسة هتجيبي لكل واحدة منهم شنطة مشمع من دول


    الكاسات والزجاج بشكل عام
    مبدأيا أي كرتونة فيها زجاج هتجيبي ورقة بيضا كبيرة وترسمي عليها شكل كاس وتكتبي قابل للكسر



    والزجاج احسن حاجة يتخزن في كرتونة كبيرة وكل طقم جوة العلبة بتاعتة.. لو انتى في القاهرة روحى درب البرابرة هتلاقي البلاستك اللي فيه بقاليل بتفرقع
    ده بيتباع هناك.. هاتيلك 2 وللا 3 متر وقطعي قطع كدا حطيها بين العلب




    شوفي الكرتونة اللي فيها زجاج عليها علامة كبيرة علشان لو حد من اللى بينقل لشقتك ان شاء الله هبدها وللا اتعامل معاها بعنف
    رفايع المطبخ والبلاستكات
    بردو كام كرتونة كبيرة .. تلمي حاجك فيها وتكتبي كل حاجة بتحطيها في الكرتونة.. وتلزقيها على الكرتونة علشان تبقى عارفة فيها ايه ويسهل عليكي ساعة الفرش في شقتك ان شاء الله




    الحلل والطاسات والصواني
    يفضل تلميهم في كرتونة كبيرة مع بعض (ماعدا البيركس خليه في كرتونة الزجاج افضل)




    يا بنات للعرايس اللى خلاص فرحهم مثلا في خلال شهر
    اللي هو خزين الأكل
    وعاوزاكي تستوعبي يا عروسة ان المفروض الخزين ده مثلا يكفيكي لشهر.. يعني بردو بلاش افترا.. انتي رايحة بيت راجل ملو هدومه ومسئوله منه كفاية قوي على اهلك مصاريف خزين اول شهر


    وياريت تكون حاجات جاهزة على الطبخ يعني لو بانيه او بوفتيك يكون متتبل لو فراخ تكون متنضفة ومتقطعة لو سمك يكون متنضف كويس قوي كدا يعني
    وطبعا انتو فردين يعني بلاش اللى بسمعو من 10 كيلو لحمه و20 فرخة والكلام ده
    ولو بقوليات تكون متنقية وياريت لو فيه امكانيات تجيبي برطمانات بلاستيك محكمة الغلق للحاجات دي



    حلة الاتفاق
    هنتكلم الاول عنها.. فيه ناس من عاداتهم زي ما هيروح للعروسة يروح لحماتها.. الناس دي ملناش دعوة بيها

    وانا شخصيا بفضل حلة الاتفاق تكون على رغبة ومزاج العريس والعروسة.. وغالبا العروسة بتستدرج العريس بيحب المأكولات البحرية وللا الطيور وللا اللحوم وبتتفق بقى مع مامتها

    فهيبقى ديك رومي (صغنن) أو دكر بط معاه 3 اجواز حمام ومعاهم صينية رقاق او مكرونة بشاميل وحلة محشي صغننة معاهم أي نوع او اتنين سلطة (تكون متعانة فى التلاجة بدل ما تحمض).. ده لو العريس بيحب الطيور

    كيلو ونص كباب وكفتة معاه 3 اجواز حمام (اصلا الحمام ده اساسي) معاهم صينية بشامل او رز بالخلطة والسلطات بردو.. ده لو العريس بيحب اللحوم

    كيلو جمبري مقاس كبير معاه سبيط معاهم كيلو سمك (يفضل فيليه مقلي) وطبعا الرز والسلطات
    ( وأهم حااااااااااااااااجة يا حبيبتي الحاجة تعينيها فى التلاجة بدل ما تعب ماما وشقاها ونعمة ربنا تترمي فى الزبالة)


    انا عاملة زي خريطة كدا يا اما مأكولات بحرية.. يا اما حمام مع لحوم.. يا اما حمام مع طيور


    الفريزر
    2 فرخة
    1ك بانيه
    2ك لحم على حسب الرغبة (بوفتيك وللسلق او عرق لحمة باردة مثلا)
    1ك لحم مفروم على كيسين
    2 او 3 كيلو سمك
    ولو ام العروسة مدلعاها وبتحب العريس يبقى هتجيبلها دكر بط وكام جوز حمام
    كيسين من كل نوع خضار (بامية/ فاصوليا خضراء/ بسلة/ قلقاس/ ملوخية/ جزر"قطعيه مكعبات واعمليه انتى مش جاهز"/ طماطم مضروبة فى الخلاط.. واصلا كل دول تقدري تجيبيه

    م طازة وتجهزيهم نص سلقة وتفرزيهم وتوديهم على بيتك)
    كيلو همبورجر (او اعمليه انتى في البيت أو اشتريه من حد بيعمل اكلات بيتي)


    افتكري مش مطلوب منك اكتر من خزين شهر بس يا بنات.. حاجات بسيطة بس متنوعة



    باقي التلاجة
    (دي عليها اختلاف ناس عاداتهم عالعريس وناس عالعروسة عشان كدا هكتبها بردو)
    اربع اكياس خبز
    ربع جبنة رومي
    ربع جبنة فلمنك

    ربع جبنة بيضا ملح خفيف او اسطمبولي
    علبة مربى صغيرة
    عسل ابيض
    عسل اسود
    طحينة
    مخلل
    6 علب زبادي
    لبن
    كرتونة بيض
    ربع بسطرمة
    كاتشب/ مايونيز/ مسطردة (لو متعودة عليهم او بتستخدميهم)
    مشروب غازي او عصائر
    نوعين فاكهة
    خضار السلطة (نص خيار/ نص طماطم/ نص جزر/ خس/ نص فلفل)


    بلاش موضوع كيلو من كل نوع جبنه ده يا اما ربع يا اما نص لو نوع انتى وهو بتحبوه قوي



    البقوليات والنواشف والتوابل
    شكارة رز 5 كيلو
    3 كيلو سكر
    3 كيلو مكرونة اشكال مختلفة (وعلى فكرة السايبة والله احلى من الجاهزة)
    2ك دقيق
    1ك لسان العصفور
    1ك شعرية
    نص لوبيا
    نص فاصوليا بيضا
    نص عدس أصفر
    نص عدس بجبة
    نص حمص الشام
    نص ذرة فشار
    كيلو ترمس
    (التوابل هاتي كمية بسيطة تكفي البرطمان اللى فى العلبة الدوار) وملحوظة كمان.. انا بطحن الحبهان وبطحن ورق اللاورى بيبقو اسهل وانتى بتطبخي
    فلفل/ كمون/ شطة/ مستكة/ حبهان/ ورق لاورى/ توم بودرة/ بصل بودرة/ بابريكا/ زعتر/ كاري/ توابل فراخ/ توابل لحمة (اسمهم كدا عند العطار وفيه كمان توابل شاورمة او حواوشي)/ كسبرة ناشفة/ قرفة/ جنزبيل

    ربع كريم شانتيه سايب من عند العطار (لزوم الدلع بقى سلطة فواكه ميلك شيك حاجات من دي)


    بصراحة مش بستوعب اللي بيجيبو شكارة رز 25 كيلو وزيهم مكرونة وكراتين بقوليات.. عرفتو ليه البنات بتضرب بعد الجواز والرجالة بيطلعلها كرش
    خزين المطبخ
    5 كيلو بصل
    5 كيلو بطاطس
    2 كيلو توم أو 4 لفة توم صيني
    زيت

    خل
    سمن (لو بتستخدميه)
    كرتونة صلصة اكياس (الاكياس عمليه لان البرطمان بيدخله هوا والصلصة ممكن تبوظ)
    5 اكياس ملح
    مرقة دجاج او لحمة اوخضار

    مشروبات (شاي/ قهوة/ كاكاو/ كركديه/ حلبة/ ينسون/ نسكافيه)
    3 او 4 علب تونة
    نشا
    كيك جاهز نكهتين مثلا او3
    كريم كرامل او كاسترد او جيلي
    بيكنج باودر وفانيليا








    خلي بالك اللستة دي معظمها من السوبر ماركت.. ورقة وقلم تكتبي حاجتك وبلاش تسرحي لا تخربي بيت الحج ويطردك من البيت



    خزين المنظفات
    مسحوق الغسالة (علبة 4 كيلو حلوة قوي)

    معطر ومنعم ملابس (مش لازم داوني فيه عند بتاع المنظفات وبيأدي الغرض ويعمل ريحة حلوة جدا بردو)
    سائل غسيل المواعين
    5 قطع سلك مواعين
    5 ليفة مواعين يكون فيها سفنج للتيفال وظهرها اخضر دي
    10 قطع صابون
    2 لفة مناديل مطبخ
    4 لفة ورق تواليت
    4 علب كبريت
    نص كيلو أكياس للتخزين
    نص كيلو أكياس زبالة
    لفة ورق فويل
    ورقة فويل قوية للبتوجاز
    لفة بلاستيك (اللي زي عند البقالين هتفيدك قوي للحاجة اللي بتعينيها فى التلاجة)
    مذيب للدهون (اللهلوبة بتاع ماي واي ب7 جنيه وبجد تحفة يا بنات)
    كلور
    فنيك (لو عندك حساسية بلاااااااااااش)
    فلاش لتنظيف التواليت
    معطر جو (بردو مش لازم الغالي هتلاقى عند بتوع المنظفات)
    ملمع الزجاج
    علبة فوط صحية






  4. #4
    ودي عروسة جيالكوا تكتب تجربتها لتستفاد العرايس المحتاسات اللى من القاهرة عن الأماكن اللى بلقط منها حاجات لجهازي

    مبدأيا يا بنات بالنسبة للهدوم ورفايع المطبخ يستحسن تلقطيهم على مراحل متدبسيش نفسك انك تنزلي في يوم واحد وتدخلي محل واحد بس.. مش كل الاذواق اللي فيه هتعجبك او هتجيبي علشان تخلصي وخلاص وفى الاخر تروحي تعيطي علشان مش مقتنعة قوي بالحاجة

    ندخل بقى على حاجة حاجة

    اللبس
    عندك يا ستى محلات بواقي التصدير ممكن تلقطي منها شوية حاجات حلوة زي شعبان اللى فى الهرم او عوف اللى فى وسط البلد او دولفين بردو فى الهرم وليه فرع فى الزقازيق وفرع فى المنيل
    المحلات دي جبت منها بلوزات حلوة قوي بيتراوح سعر البلوزة من 30 ل 60 جنيه وبوفق عليها برمودا سترتش ب10 جنيه ويبقى كانها احلى بيجامة

    وعندك ممر الراعي الصالح في شبرا.. طبعا هتفاصلي.. بس هناك ممكن تلقطي هدوم خروج حلوة وفيه كمان حاجات بيت حلوة قوي
    جبت من هناك كام كاش مايوه وجمعت طقم خروج وطقم بيت شتوي دلع ومسخرة


    البيجامات التركي اللى مجننة البنات

    بصراحة دول بلاقيهم على النت واول مرة اجيب منهم اتخميت فى السعر جامد والبنت قعدت تعملى البحر طحينة وانا ارخص سعر ومعرفش ايه لحد ما اتعلمت اقارن الاسعار فى النت فى 100 جروب قبل ما اقرر اشتري


    ولو انتي من اعداء الشراء من على النت روحي اي مول هتلاقي محلات اللانجيري بتبيع بيجامات تركي ممكن اغلى شوية بس هتشوفي قدامك الحاجة وتشتري وانتى مطمنة
    بشكل عام انا شفت التركي فى كذا محل فى سيتي سنتر فى الهرم وفى كايرو مول بردو فى الهرم

    وكمان كل ما اروح راس البر لازم السوق هناك اساسي بجيب كام حاجة للبيت بناطيل وبرمودا سترتش وكاشات مايوه والعباية الفراشة وطبعا بتفاصلي

    وطبعا البيجامات هتروحي زي الشطورة الغورية.. والله احلى بيجامات سوري ومصري هناك وكاشات مايوه بردو زي اللى فى راس البر بس اغلى حاجة بسيطة

    وقمصان النوم لقطيها بقى كام واحد نضيف من المحلات اللى فى المولات الحلوة على الاغلبية من الغورية فيها حاجات حلوة قوي ورخيصة (وافتكري ان قمصان النوم اكتر حاجة هتزهقي منها ولو جبتي بردو 300 قميص هتبقى عايزة بعد اقل من سنة تجيبي جديد فهاتي عدد قليل ومتجيبيش الا واحد وللا اتنين بس غاليين)


    ولبس الخروج النضيف بقى طبعا لسة مش هشتريه غير لما نشنكل ابن الحلال ونكعبله كدا (ادعولي يا بنت انتى وهية)


    المفروشااااااااااات
    عاوزة تفصلي ملايات عليكي وعلى الوكالة يا قمر بتنقي وتفصلي وانتى واقفة
    عاوزة جاهز عليكي وعلى الغورية.. وتقولي للبياع قطن صافي مش مخلوط انا جبت من هناك فيه كل الاذواق مودرن تحففففففه وكلاسك بردو اللى بكرانيش واورجانزا وحتى ستان وملايات باستك (بس لازم تكوني عارفة مقاس سريرك)
    البطاطين بردو فيه كل حاجة من اول الصيني النص نص والنضيف زي المجد والكوري وتقليد الاسباني (مورانو) والاسباني الاصلي اللى هو (مورا)
    وهتلاقي كمان كوفرتات التقليدية وكوفرتات قطيفة ووش قطن ووش قطيفة ومبطنة فايبر خفيف

    عندك كمان كاربت سيتي للمفروشات احلى وانضف فوط (بس غالية شويتين المقاس الوسط ب40 الواحدة) والبرنس الفرداني ب265 بس عنده لحفة فظييييييييييييييييييعة وبطاطين وكوفرتات اخميم دي تحفففففففففة ومميزة جدا


    حاجات المطبخ والنيش
    بصي بقى يا قمر.. احنا هنقسمها لتقايل ورفايع

    التقايل تقدري فى يوم واحد تنزلي تجيبيها وفى تاكسي وتروحي على البيت (وطلعيها دئلجة على السلم زيي لو ملكيش اخوات صبيان

    منين بقى
    عندك محبوبي درب سعادة ومول وكالة الازهر في العتبة (قبل الغورية علطول)
    هتجيبي الحلل والطاسات ولو عجبتك رفايع حلوة بردو طقم المغارف طقم المعالق مصافي طقم توابل صفاية اطباق

    طقم الصيني بقى منصحكيش تجيبيه الا بعد ما تلفي وتشوفي كل الاذواق علشان تجيبيه وانتى مقتنعة تماما
    وغالبا مول وكالة الازهر فيه اذواق حلوة
    وكمان داري في محطة جامع السلام في الهرم
    ومحل أواني فى سيتي سنتر قدام مستشفى الهرم (حاجات مميزة على حاجات عادية)
    ومحل تيوليب فى شارع مصدق فى الدقي (غالي بس حاجات مميزة جدااااااااااااااااا)
    ومحل كيتشن ستور في شارع مصدق فى الدقي (معقول وحاجاته واذواقه معقولة لا مميز قوي ولا شعبي)
    كارفور ممكن تلملمي منه رفايع على بلاستكات وفيه اطقم عشا حلوة وممكن تجمعي طقم لومينارك فرداني.. سكاكين حلوة ونضيفة وطقم معالق وشوك للاستخدام
    وبنات بيشكرو في محل اسمه شارع عبد العزيز في مدينة نصر بيقولو كبير وفيه كل حاجة


    الأجهزة الكهربية بقى
    انصحك يا اما من بي تك (مبحبهاش) يا اما من كارفور او سبينيس وفيه كمان شركة القاهرة للمبيعات فى ميدان السبع عمارات (فيها توكيل كينوود) وانا جبت الخلاط بتاعي من هناك
    بالنسبة للمنصورة لاني ليا فرع عائلي هناك وبروح زيارات مرة او اتنين فى السنة
    بجيب من عوض الله رفايع زي سكاكين مقشرة مضرب بيض يدوي اطباق بلاستك لاستخدام التلاجة .. عنده حاجات حلوة بصراحة
    ومحل اسمه الزامك فى شارع الجلاء.. ومحلات هي ورزقها والحاجات بتاعة رفايع 2.5 كمان هناك بجيب منها حاجات حلوة
    ومحلات اللبس فى الجلاء اسعارها معقوله وفيه هناك محل بيبيع بيجامات تركي مش فاكرة اسمه بس هو جنب محل كوككا
    وممكن شارع السكة الجديدة كمان تلقطي منه لبس بيت حلو كاشات وسترتشات وكدا

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
جَمِيع الحُقُوق مَحفُوظَة لِمَوقِع أحلَىَ حَاجَة © 2012
Powered by vBulletin® Version 4.1.10